Dje patëm kënaqësinë të kishim të pranishëm gjatë programit edukativ “Kujtojmë për të mos harruar”, zëvendëskryetarin e Prezencës së OSBE -së, z. Robert Wilton. Takimin e hapi drejtoresha e Muzeut, znj. Etleva Demollari e cila tha se prioritet i punës së muzeut është njohja e brezit të ri me të kaluarën komuniste duke i ndihmuar ata të kuptojnë se si funksiononte regjimi totalitar, ndaj muzeu organizon vazhdimisht programe edukative.
z. Robert Wilton në fjalën e tij i ftoi të rinjtë të ishin aktivë e të angazhoheshin në ballafaqimin me të kaluarën përmes dialogut.
Nxënësit e Gjimnazi “Myslym Keta” u bënë pjesë e projektit i cili zhvillohet në kuadër të programit të lançuar nga Ministria e Kulturës, Edukimi mbi dhe përmes Kulturës si dhe me mbështetjen e OSBE -së.
Projekti ka si qëllim njohjen e brezave të rinj me të kaluarën e errët komuniste shqiptare si dhe ndërgjegjësimin e tyre rreth pasojave të komunizmit. Me anë të këtij projekti nxënësit pjesëmarrës patën mundësi jo vetëm të vizitojnë muzeun por edhe të bashkëbisedojnë me z. Arben Theodhosi, ish i dënuar politik.